छुचुन्द्राहरूको सहर
-सुवास खनाल
https://youtu.be/44QLlAfSDoM
सहरमा छुचुन्द्राहरू द्वारा तपाईँ कति सताइनुहून्छ ?
छुचुन्द्रालाई
बिरालाहरू सिकार गर्दैनन्
मान्छेहरू सोच्छन्
छुचुन्द्रा उत्ति विनाशक हुन्नन्
छुचुन्द्राहरू अप्ठेरोमा टाउको लुकाउँछन्
सप्ठेरोमा बढी देखिन्छन्
यी जे छुन्छन्
दूषित बनाउँछन्
यी जे आवाज निकाल्छन्
कर्कश लाग्छ
छुचुन्द्राहरू सधैँ फोहोरसँग अभ्यासी छन्
छुचुन्द्राका डेढअक्कलका कथाहरू छन्
सहरमा यसको कथा बिक्छ
श्रम र इमान्दारीतालाई
चाप्लुसीको दौडले जितेका
गणेश र कुमारका किस्साहरू झन् बढी बाँचेका छन् सहरमा
छुचुन्द्राहरु जीवभन्दा बढी चरित्रहरू हुन्
छुचुन्द्राहरू दगुरिरहेको समयका यथार्थहरू हुन्
शिकारका काविल हुन्छन् छुचुन्द्राहरू
सर्प आहारा बनाउने क्षमता बोक्छन्
तर
खतराको बाटो छान्दैनन्
बरु सखाप पार्छन् अनाज
अँध्यारोका हिमायती
अँध्यारो कै पुजक
छुचुन्द्राहरू
यो सहरमा
बग्रेल्ती कुदिरहेछन्
यो सहर
छुचुन्द्रा नियोजनको किन उपायहरू बुन्दैन ?
