दशैँको आयु
आश्विन २०, २०७६ मा साप्ताहिकमा प्रकाशित
सुवास खनाल
आश्विन २०, २०७६ मा साप्ताहिकमा प्रकाशित
सुवास खनाल
ऊ सहर बस्थ्यो । दशैँमा गाउँ पस्यो । पढ्न बसेको थियो । दशैँमा त गाउँ जानैपर्छ भन्ने सम्झियो र गाउँ गयो । यसरी जाँदा उसले गाउँमा दाजुहरू भेटेन । सबै विदेश उडेका थिए । कतिका त श्रीमान श्रीमति नै विदेश । बच्चाबच्ची र बुढाबुढी मात्र घरमा । पिङ खेल्ने ठाउँमा सुगठिला ज्यान भएका भाइहरू भेटेन ,ती सबै विदेश पसेका थिए । गाउँमा मेलापर्ममा मान्छे पाइन्न भन्ने सुनिन थालेको पायो । हुँदाहुदा गाउँका नातामा टाढैका तर सबैले उही नामले चिनिने जन्तरे काका बित्दा लाशलाई काँध हाल्ने चार मलामी धौ धौले जुटेको कथा सुन्यो । यता टीका लगाएर आशीश दिने हातहरू रित्ता भएको देख्यो । उता विदेशमा खाली बस्ने निधारहरूबारे चिन्तन गर्यो र अन्तमा अब यही तालले दशैँका आयु लामो नहुने निष्कर्श निकाल्यो । उसले सोच्यो –दशैँलाई विजयको प्रतीक भन्दा विछोडको स्मरण गर्ने दिन को रुपमा परिभाषा दिनुपर्ने बाध्यता । उसले आफू पनि विदेश नजाने र अरुलाई पनि देशमै केही गर्न प्रेरित गर्ने सोच सँगाल्यो । उसलाई लाग्यो –सबैमा यही सोच आए दशैँको आयु बढ्नेछ ।
