म कविता लेखिरहेको छैन
सुवास खनाल
°°°
कविता लेख्नु जतिको सजिलो छैन
मैले मेरा जीवनका पदचापहरु सुन्नु
यतिखेर
विमार अामाको ऒखति खरिद गर्न
आइपुगेको छु अौषधि पसल
एकछिन अघि भेटिन्थेँ
सागवारीमा पानी हालिरहेको
परिवार र बालबच्चाको ओठमा मुस्कान उदाउन
मैले सिञ्चित गर्ने
पसिना जत्तिको मूल्यवान छैन कविता
यसकारण
म कविता लेखिरहेको छैन
कवितामा लेखिदिन सक्छु सजिलै
देश स्वर्ग बनाउने कथाहरू
बयान गर्न सक्छु
सपनाका अध्याय
पग्लिन सक्छु
कोमल शव्दहरुमा
निर्माण गर्न सक्छु
प्रेमको ताजमहल
तर मैले सोच्नु छ विपनामा
यसकारण
म कविता लेखिरहेको छैन
स्रमको युद्धमा टुग्याउनु दैनिकी
पढ्नु बाबाको अनुहारको खुसीको रंग
संगतमा अल्झिनु मान्छेहरूसॅग
र बुझ्नु प्रत्येक मान्छेका मान्छे भई बाॅचेका कथाहरू
यी जति सुन्दर छैनन्
मैले लेख्ने कविता
त्यसैले
म कविता लेखिरहेको छैन !
